كارتێكرنا نه‌خۆشيێن دومدرێژ ل سه‌ر پێكئينانا هـه‌ڤژينيێ‌

 

 

د جڤاكێ‌ مه‌دا هـه‌كه‌ كچه‌كێ‌ نه‌خۆشيه‌كا دومدرێژ هـه‌بيت كوڕ بۆ خوه‌ ناخوازن، د هـه‌مان ده‌م ژي دا هـه‌كه‌ كوڕي نه‌خۆشيه‌كا ب ڤي ره‌نگي هـه‌بيت كچ شوو پێ ناكه‌ت، خوه‌ هـه‌كه‌ چه‌ند ئێكدو ژي بڤێت، ڤه‌كۆله‌ره‌كێ‌ جڤاكي دبێژيت، ئه‌ڤه‌ تشته‌كێ‌ شاشه‌ و د ڤي ده‌مي دا پێدڤيه‌ حكوومه‌ت رۆلێ‌ خوه‌ ببيني

 

 

ئافره‌ته‌كێ‌ كو نه‌ڤيا ناڤێ‌ خوه‌ بێژيت دياركر كو، ئه‌ڤه‌ چوار ساله‌ وێ‌ شووكري و ئه‌وێ‌ نه‌خۆشيه‌كا دومدرێژ ژي يا هـه‌يي و گوت: (به‌ري كو ئه‌م هـه‌ڤژينيێ‌ پێك بينين، مالباتا من گۆته‌ كوڕي كچامه‌ ئه‌ڤ نه‌خۆشيه‌ يا هـه‌يي پاشي ئه‌و كوڕ يێ‌ رازيبوو، پشتي چه‌ند ساله‌ك ب سه‌ر ژيانا مه‌ ڤه‌ چووين و ده‌مێ‌ وي ديتي ئه‌ز به‌رده‌وام پێدڤي ب چاره‌سه‌ريامه‌ و مه‌زاختنه‌كا زۆر ل من دچيت، نهـا ئه‌ز وه‌سا دبينم كو هـه‌ڤژينێ‌ من يێ‌ په‌شيمانه‌ ئه‌ز ئينايم

 

 

ناڤبريێ‌ هـێشتا گوت: (ئه‌ز و زه‌لامێ‌ خوه‌ نهـا زۆر ب به‌خته‌وه‌ري پێكڤه‌ دژين، به‌لێ‌ د هـه‌مانده‌م دا بۆ من نه‌خۆشه‌ كو زه‌لامێ‌ من ئه‌ڤ هـزره‌ ل نك هـه‌نه‌، ل ڤێره‌ ئه‌ز دبێژمه‌ هـه‌موو وان كه‌سانێن نه‌خوشيێن دومدرێژ هـه‌يي، ده‌مێ‌ ژيانا هـه‌ڤژينيێ‌ پێك دئينن راستيان بۆ ئێكدو بێژن، هـه‌كه‌ نه‌ رۆژه‌ك و دوو نينه‌ مرۆڤ نه‌خۆشيا خوه‌ ڤه‌شێريت، چونكو ل ڤي ده‌مي نه‌ دووره‌ ژيانا وان تێكبچيت و كه‌سانێن ساخ چ گونه‌هـا خوه‌ نينه‌ كو چ ژ نه‌خۆشيا ته‌ نه‌زانيت و تو به‌رپرسياري هـه‌كه‌ نه‌شيا ته‌ ب رێڤه‌ ببه‌ت

 

 

ڤه‌كۆله‌ره‌كێ‌ جڤاكي دياركر كو، هـه‌موو كچ و كوڕان ده‌مێ‌ گه‌هـشتنه‌ قوناغه‌كێ‌ مافێ‌ وايه‌ كو گرێبه‌ستا هـه‌ڤژينيێ‌ پێك بينن و هـه‌كه‌ نه‌شيان ژ به‌ر نه‌خۆشيا خوه‌ ژيانا هـه‌ڤژينيێ‌ يان ژ به‌ر هـه‌ر ئه‌گه‌ره‌كا دي چ يا جڤاكي بيت يان ئابووري پێدڤي يه‌ كو حكوومه‌ت دڤێ‌ مژارێدا رۆلێ‌ خوه‌ ببينيت، چونكو مافێ‌ وايه‌ ئه‌و ژي بگه‌هـنه‌ خۆشيا ژيانا هـه‌ڤژينيێ‌

).

 

كوڤان كو گه‌نجه‌كێ‌ د ژيێ‌ 23 ساليێ‌ دايه‌ دياركر كو، وي هـه‌ڤژيني پێك ئينايه‌ و وان هـه‌ردوويان ژي چ نه‌خۆشي نينن و گوت: (هـه‌كه‌ من زانياري ده‌رباره‌ي كچێ‌ پێش وه‌خت نه‌بانه‌، وان ژي ئه‌ز ئاگه‌هـدار نه‌كربامه‌، ره‌نگه‌ د ناڤبه‌را مه‌دا يا نه‌خوشه‌بايه‌، به‌لێ‌ هـه‌كه‌ ب ره‌زامه‌نديا هـه‌ردويان بيت ئه‌ڤه‌ تشته‌كێ‌ سرۆشتي يه‌ خوه‌ هـه‌كه‌ نه‌ساخي ژي هـه‌بيت، لێ‌ ئه‌ز ل گه‌ل هـندێ‌ مه‌ كو كه‌سانێن ساخ ژيانا هـه‌ڤژينيێ‌ ل گه‌ل نه‌ساخان پێك نه‌ئينن ژ به‌ر كو ئه‌و هـه‌ر يا تووش بووي بلا هـنده‌كێن دن ژي تۆش نه‌كه‌ت

).

 

جه‌عفه‌ر مايي ڤه‌كۆله‌رێ‌ جڤاكي دياركر ژي، د جڤاكێ‌ دا كچ پتر دبيته‌ قورباني، ژ به‌ر كو دايك و باب مال مال دچن بۆ خواستنا كچه‌كێ‌ بو كوڕێ‌ خوه‌ و يێ‌ به‌رهـه‌ڤه‌ژي كو مه‌زاختنه‌كا زۆر بو بكه‌ت، به‌لێ‌ بۆ كچي ئه‌و نه‌يێ‌ به‌رهـه‌ڤه‌ كو ديناره‌كێ‌ ژي لێ‌ ب مه‌زێخيت و گوت: (خه‌لكێ‌ مه‌ فێربوويه‌ ژ تشتێ‌ باش بگه‌ريت و كه‌س خوه‌ به‌رپرس نابينيت، ب هـزرا من ئه‌و ژي مافدارن ژ به‌ر كو ئه‌و نابينن كو سيسته‌مه‌ك هـه‌بيت بشێت پشته‌ڤانيا وان بكه‌ت كو هـه‌كه‌ پێدڤي بوو هـاريكاريان وان بكه‌ت نه‌خاسمه‌ ژ ئاليێ‌ حكوومه‌تێ‌ ڤه‌

).

 

شێرزاد عومه‌ر كو بابێ‌ دو كچا و كوڕه‌كێ‌ يه‌ دياركر كو ئه‌و كچێن خوه‌ ناده‌ته‌ چ كوڕان كو نه‌خۆشيه‌كا دومدرێژ هـه‌بيت و به‌روڤاژي چ كچان ژي بۆ كوڕێ‌ خوه‌ نائينيت هـه‌كه‌ نه‌خۆشيه‌كا دومدژێر هـه‌بيت و گوت: (ژ به‌ر كو مه‌ د كوڕدستانێ‌ دا چ قانوون نينن كو مافێن كه‌سانێن نه‌خۆش گه‌رنتي بكه‌ن، ئه‌م ژي هـه‌ژارين دڤێت يان خوه‌ ب رێڤه‌ ببه‌ين يان نه‌خۆشان ژ بلي كو د پاشه‌روژێ دا دێ‌ كارتێكرنێ‌ ل سه‌ر زارۆيێن وان ژي كه‌تن

).

 

هـه‌ر ل سه‌ر ڤي ته‌وه‌ري دكتور ئه‌يوب مێرگه‌سووري نوشدارێ‌ گشتي ل نه‌خوشخانا مێرگه‌سورێ‌ دياركر كو، كومه‌كا نه‌خۆشيان هـه‌نه‌ مينا نه‌خۆشيا شه‌كرێ‌، تالاسيما، په‌نجه‌شێر، نه‌خۆشيێن خوينێ‌، نه‌خۆشيا بووماوه‌يي ... هـتد كو جڤاكێ‌ مه‌ بۆ خوه‌ دكه‌نه‌ هـێجه‌ت كو ژيانا هـه‌ڤژينيێ‌ پێك نه‌ئينن و گوت : (ئه‌گه‌را سه‌ره‌كيا ره‌تكرنا ئه‌ڤان جوره‌ هـه‌جه‌تان خوه‌ په‌رستي يه‌ نه‌خاسمه‌ ل ده‌ڤ كوڕان ژ به‌ر كو دابينكرنا هـه‌موو پێدڤيێن هـه‌ڤژينا خوه‌ ل سه‌ر ملێن خوه‌ دبينيت و تشتێ‌ پێدڤي كو گه‌نجێن مه‌ پێش هـه‌ڤژينيێ‌ بكه‌ن ئه‌ڤه‌يه‌ كو رێكا چاره‌سه‌ريێ‌ بزانن و پشكنينان بۆ ئێكدو بكه‌ن، پرانيا نه‌خۆشيان هـه‌كه‌ چاره‌سه‌ريێن پێش وه‌خت بو بهـێنه‌كرن چ كاريگه‌ريێن خراب نينه‌ ل سه‌ر ژيانا وان

).

 

نوشداري هـێشتا گوت: (هـنده‌ك جورێن نه‌خۆشيان يێن هـه‌ين، هـه‌كه‌ گه‌نجێن مه‌ خوه‌ ژ هـه‌ڤژينيێ‌ بپارێزن بۆ وان باشتره‌ وه‌كو نه‌خۆشيێن دهـێنه‌ ڤه‌گۆهـاستن بۆ نموونه‌ ئايدز، ديسا وان نه‌خۆشيان كو كاريگه‌ري ل سه‌ر ژيانا زاروكێن وان هـه‌يي، ئه‌ڤه‌ تشته‌كه‌ خودێ‌ دايي و دڤێت ئه‌م خوه‌ بپارێزين داكو كاريگه‌ري ل سه‌ر لايه‌نێن دن دروستن نه‌بن

).

 

ل دووماهـيێ‌ نوشداري سه‌رهـاتيه‌كا راست كو وي ب چاڤ ديتيه‌ دڤيا بو خوێنده‌ڤانێ‌ ئه‌ڤرۆ بێژيت و گوت: (دو هـه‌ڤژينان ئێكێ‌ ژ وان نه‌خۆشيا په‌نجه‌شێرێ‌ هـه‌بوو، پشتي ده‌مه‌كێ‌ درێژ پێكڤه‌ ژيايێن و پشتي هـه‌ڤژينا وي ديتي كو ئه‌ڤ نه‌خۆشيه‌ ل ده‌ڤ زه‌لامێ‌ وێ‌ يا به‌رده‌وامه‌، دووماهـيێ‌ خوه‌ ل وي دا به‌ردان و ئه‌و هـێلا د وێ‌ نه‌خۆشيێ‌ دا، ئه‌ڤ چه‌نده‌ دووباره‌ نه‌بيت د هـنده‌ك حاله‌تان دا هـه‌كه‌ هـه‌ڤژيني نه‌هـێته‌ پێكئينان گه‌له‌ك باشتره‌

).

 

              

بۆچي ده‌مێ‌ كچ ژ مال ده‌ردكه‌ڤن تووشي لێپرسيني دبن؟

وه‌كو ديار د ناڤ جڤاكێ‌ مه‌دا، چ دووڤچوون و لێپرسين ل گه‌ل كوڕان ناهێته‌كرن ده‌مێ‌ ژ مال ده‌ردكه‌ڤن و دمينن ل جاده‌يان هه‌تا ده‌رنگي ب شه‌ڤ، لێ‌ هه‌كه‌ كچ هه‌تا ب رۆژ ژي ژ مال ده‌ربكه‌ڤيت، دێ‌ تووشي لێپرسيني بيت ژ دايك و بابان يان برايێن خوه‌ يێن مه‌زن. ئئڤ چه‌نده‌ ب ديتنا هنده‌ك كه‌سان ل سه‌ر په‌روه‌رده‌كرنا مالێ‌ رادوه‌ستيت

 

 

 

كچه‌كا قوتابي ل زانكۆيا دهۆكێ‌ ب ناڤێ‌ ناجيه‌ بۆ ئه‌ڤرۆ دياكر كو، هه‌كه‌ كچ يا پووچ بيت خوه‌ كه‌س و كارێن وێ‌ بكه‌نه‌ د ژووره‌كا گرتي ڤه‌ ژي و ده‌ست و پێيێن وي گرێده‌ن، دێ‌ هه‌ر پووچاتيا كه‌ت و گۆت: (ئه‌ز باش ئاگه‌هدارم كو گه‌له‌ك جاران چاڤدێري ل سه‌ر كچێ‌ دهێته‌كرن و گه‌له‌ك جاران ئه‌و تووشي دووڤچوونه‌كا هوور دبيت ژ ئاليێ‌ خێزانێ‌ ڤه‌، لێ‌ پرسيار ئه‌ڤه‌يه‌، بۆچي لێبرسين د هه‌مان ده‌مدا ل سه‌ر ره‌فتارێن كوڕان ژي ناهيته‌كرن، ما ئه‌و ژي هه‌ر نه‌ مرۆڤن

 

 

 

به‌يار عزه‌ت به‌رپرسێ‌ سه‌نته‌رێ‌ رزگاري يي ره‌وشه‌نبيري دياركر كو، د ڤي واري دا جوداهي د ناڤبه‌را ره‌گه‌زێ‌ نێر و مێ‌ دا گه‌له‌ك هه‌يه‌، د ناڤ جڤاكێ‌ مه‌دا دروسته‌ بۆ كوڕان ب كه‌يفا خوه‌ ده‌ربكه‌ڤن ل هه‌ر جهه‌ك و ده‌مه‌كێ‌ هه‌بيت، لێ‌ بۆ كچان دروست نينه‌ و هه‌كه‌ كچێ‌ وه‌كر ژي، دێ‌ دووڤچوون ل سه‌ر هێته‌كرن چ ژ ئاليێ‌ دايك و بابان يان برايێن وێ‌ ڤه‌ و گۆت: (ئه‌ڤ چه‌نده‌ ڤه‌دگه‌ريت بۆ تێگه‌هشتنا نه‌دروست يا دايك و بابان، ژ به‌ر ڤێ‌ يه‌كێ‌ پێدڤيه‌ ب رێيا ئه‌نجامدانا كور وسميناران ل هه‌موو ده‌ڤه‌ران بۆ خه‌لكێ‌ بهێته‌ شرۆڤه‌كرن كو جوداهي د ناڤبه‌را ره‌گه‌زێ‌ نێر ومێ‌ دا نێنه‌

 

 

 

ژ ئاليه‌كێ‌ دن ڤه‌ به‌رپرسێ‌ سه‌نته‌رێ‌ رزگاري دياركر كو، په‌روه‌رده‌كرنا دروست يا خێزانێ‌ رۆلێ‌ خوه‌ هه‌يه‌ بۆ په‌يداكرنا ئه‌ندامه‌كێ‌ ساخله‌م د جڤاكي دا، و گۆت: (راسته‌ ديتنا جڤاكي و هزرێن عه‌شيره‌تگه‌ريێ‌ گڤاشتنان دئێخنه‌ ل سه‌ر مێشكێ‌ ره‌گه‌زێ‌ نێر كو ئه‌ڤي تشتي ژ كچێ‌ قه‌بوول نه‌كه‌ت، لێ‌ ب ديتنا من هه‌ر ده‌مێ‌ تێگه‌هشتنا هه‌دو دروست بوو ئێدي ئه‌ڤ ديارده‌ نامينيت

 

 

ڤه‌كۆله‌ري جڤاكي عه‌بدولجه‌بار ل سه‌ر هه‌مان بابه‌ت دياركر كو، داب و نه‌ريتێن جڤاكي رێگرن ل به‌رامبه‌ر كچێ‌، لێ‌ نها ئه‌ڤ رێگريه‌ يا به‌ره‌ڤ كێمبوونێ‌ ڤه‌ دچێت د ناڤ كۆمه‌لگه‌هێ‌ كوردي دا و هنده‌ك كچان هه‌تا راده‌يه‌كێ‌ باش ئازادي يا هه‌ي دوور ژ دووڤچوونێن كه‌س و كارێن وێ‌ و گۆت: (هه‌موو ده‌مان ره‌گه‌زێ‌ نێر ده‌ركه‌فتن ب مافه‌كێ‌ خوه‌ يێ‌ تايبه‌ت قه‌له‌م دايه‌ و ئه‌ڤه‌ ژي بۆ شوونوارێن به‌رێ‌ دزڤڕێت كو پێدڤيه‌ ژن ب تنێ‌ ل چاچووڤه‌يێ‌ مال دا كار بكه‌ت

 

 

 

سه‌ربه‌ست عه‌ساف قوتابيه‌كێ‌ قوتابخانه‌يا كۆمه‌لگه‌ها دوميزه‌ دياركر كو، گه‌له‌ك جاران به‌حسێ‌ پێشكه‌فتنێ‌ و ئازادييێ‌ را ده‌ربرينێ‌ و سه‌ربه‌ستيێ‌ دهێته‌كرن، لێ‌ ئه‌ڤه‌ هه‌موو ب تنێ‌ گۆتنن و هێشتا داب و نه‌ريتێن كه‌ڤن دزالن ل سه‌ر مێشك و ده‌روونێ‌ مه‌، ژ به‌ر ڤێ‌ يه‌كێ‌ كچ بوويه‌ قورباني ڤان داب ونه‌ريتنان و گۆت: (د ناڤ گه‌له‌ك خێزانان دا رێ بۆ كچێ‌ ناده‌ن ده‌ربكه‌ڤيته‌ ل سه‌ر جاده‌يێ‌ و ياريان بكه‌ت، ديسا مال هه‌نه‌ ژي وه‌ ناكه‌ت بچيته‌ بازاري يان هه‌تا دۆكانه‌كێ‌ كو بۆ خوه‌ تشته‌كي بكريت، ژ به‌ر ڤێ‌ يه‌كێ‌ دێ‌ وه‌سا و ب ڤێ‌ په‌روه‌رده‌كرنێ‌ مه‌زن بيت

 

 

 

لازمه‌ يوسف به‌رپرسا ئێكه‌تيا ئافره‌تان ل شنگال د په‌يوه‌نديه‌كا ته‌ليفووني دا ئاشكراكرن كو، ل گه‌ل دروستبوونا مرۆڤي ژن ژي مل ب ملێن زه‌لامي ڤه‌ بزاڤان دكه‌ت بۆ خۆشكرنا ژيارا خوه‌ و دابينكرنا ئاينده‌يه‌كێ‌ گه‌ش كو تێدا ب سه‌ربه‌ستي بژيت و گۆت: (ده‌ركه‌فتن و دونيا ديتن مافه‌كێ‌ شه‌رعي يه‌ بۆ ره‌گه‌زێ‌ مێ‌، حالێ‌ وێ‌ ژي ب حالێ‌ زه‌لامي، نها ل گه‌له‌ك ده‌ڤه‌ران خێزان هه‌نه‌، ژ به‌ر بابه‌تێن عه‌شيره‌تگه‌ريێ‌ كچ نه‌شێت بۆ خوه‌ ده‌ربكه‌ڤيت هه‌تا كاره‌كێ‌ فه‌ر ژي هه‌بيت، ديسا ده‌مێ‌ ده‌ركه‌ڤيت ژي، دڤێت هنده‌ك ل گه‌ل بن و تشته‌كێ‌ زۆر نورماله‌ ژي دووڤچوون ل سه‌ر بهێته‌كرن

 

 

 

كارتێكرنا رۆلێ‌ ژنێ‌ د نه‌هێلانا ئاريشه‌يێن خێزاني دا

 

يا زانايه‌ كو هه‌ر خێزانه‌كێ‌ ئاريشه‌ و پرسێن خوه‌ هه‌نه‌، لێ‌ هنده‌ك ئاريشه‌ هه‌نه‌ دبنه‌ ئه‌گه‌رێن تێكدانا ژيانا خێزانێ‌، كه‌سانێن بسپور د وارێ‌ جڤاكي دا دبينن كو، باشترين رێ ژ بۆ رێگرتن ل ئاريشه‌يێن خێزاني ئه‌وه‌ كو، ژن رۆلێ‌ خوه‌ دروست ببينيت و زه‌لام ژي پشتگيريا رۆلێ‌ وێ‌ بكه‌ت

.

 

شاره‌زايێ‌ جڤاكي جه‌عفه‌ر مايي ل دۆر ئه‌و ئاريشه‌يێن د ناڤ خێزانان دا په‌يدا دبن دياركر كو، د ناڤ خێزانان دا گه‌له‌ك جۆرێن ئاريشه‌يان په‌يدا دبن ئه‌و ژي ژ به‌ر ئه‌گه‌رێن جياواز ژ وان ژي، ئاريشه‌يێن د ناڤبه‌را ژن و مێران دا ل سه‌را

 

زارۆيان، ديسا په‌يوه‌نديێن ل گه‌ل كه‌س و كاران، هه‌روه‌سا ساريا سيكسي د ناڤبه‌را ژن و مێران دا كو ئه‌ڤ چه‌نده‌ به‌هرا پتر يا ڤه‌شارتي يه‌، لێ‌ دبيته‌ ئه‌گه‌ر كو ل ئێكدو ب هێجه‌ت بن و ئه‌و ب خوه‌ ژي نزانن كو ئاريشه‌يا وان ئه‌ڤه‌يه‌ و گۆت: (ده‌مێ‌ دايك ته‌نازولێ‌ ژ رۆلێ‌ خوه‌ به‌رامبه‌ري زارۆيان دكه‌ت و نه‌شێت دايكينيێ‌ د چاڤێن وان دا پڕ بكه‌ت، دبيته‌ جهێ‌ په‌يدابوونا ئاريشه‌يان

).

 

هه‌روه‌سا مايي ئاشكرا كر كو، گه‌له‌ك د جڤاكێ‌ مه‌ دا يا به‌رچاڤه‌ ده‌مێ‌ كو باب سالاري ژ چارچووڤه‌يێ‌ دادپه‌روه‌ريێ‌ ده‌ربكه‌ڤيت و زۆرداريێ‌ بكاربينيت و زێده‌گاڤيێ‌ ل سه‌ر مافێن زارۆ و هه‌ڤژينا خوه‌ بكه‌ت ل هه‌ر بياڤه‌كي، دێ‌ كارتێكرنه‌كا هه‌ري مه‌زن ل سه‌ر په‌يوه‌نديێن خێزاني كه‌ت

.

ژ زاخۆ ڤه‌كۆله‌رێ‌ جڤاكي به‌يار باڤي دا زانين كو، هنده‌ك ئاريشه‌يان په‌يوه‌ندي ب ته‌كنۆلۆژيايێ‌ ڤه‌ هه‌يه‌ و دايك و باب نه‌شياينه‌ د خێزانێ دا رۆله‌كێ‌ ئه‌كتيڤ بگێرن و ڤێ‌ ته‌كنولوژيايێ‌ زارۆ ل بن كۆنترۆلا دايك و بابان ده‌رئێخستينه‌ و يا

 

بوويه‌ ئاريشه‌ د ناڤبه‌را دايك و باب و زارۆيان دا و دايك و باب نه‌شێن ئه‌و كه‌لتورێ‌ وان بڤێت ل سه‌ر زارۆيێن خوه‌ دا بچه‌سپينن و گۆت: (هه‌بوونا گه‌له‌ك زارۆيان به‌رامبه‌ري ئابووره‌كێ‌ لاواز ره‌نگه‌ هه‌موو پێدڤيێن خێزانێ‌ دابين نه‌كه‌ت، ئه‌ڤجا دێ‌ ئاريشه‌ د ناڤبه‌را ئه‌ندامێن خێزانێ‌ دا په‌يدا دبن و ل ڤێرێ‌ پێدڤيه‌ خێزانێ‌ پلانه‌كێ‌ بۆ خوه‌ بدانيت

).

 

ل دۆر وێ‌ يه‌كێ‌ كانێ‌ د ناڤ خێزانێ‌ دا كي به‌رپرسه‌ ژ چاره‌كرنا ئاريشه‌يان؟ شاره‌زايێ‌ جڤاكي ديار كر كو، به‌هرا پتريا جاران ژن به‌رپرسه‌ و ژن سه‌نته‌ره‌ د ناڤ خێزانێ دا و گۆت: (باشترين رێ ژ بۆ رێگرتن ل ئاريشه‌يان ئه‌وه‌ كو ژن رۆلێ‌ خوه‌ دروست ببينيت و زه‌لام ژي رۆلێ‌ ژنێ‌ لێ‌ نه‌وه‌رگريت و پشتگيريا وێ‌ بكه‌ت

).

 

ژ ئاليه‌كێ‌ دن ڤه‌ جه‌عفه‌ري دا دياركرن كو، ئه‌و مالێن كو كێم گرفتێن جڤاكي تێدا بن، دياره‌ ژنێ‌ رۆله‌كێ‌ مه‌زن تێدا هه‌يه‌ نه‌خاسمه‌، نه‌خاسمه‌ ژنا زيره‌ك و كه‌سايه‌تيا ب هێزا هه‌ي دكاريت خێزانێ‌ به‌ر ب ئاقاره‌كێ‌ دروست ببه‌ت و گۆت: (زه‌لامي رۆل د چاره‌سه‌ركرنا ئاريشه‌يان دا نينه‌ و به‌هرا پتر د جڤاكا مه‌ دا باب سالارييێ‌ بكاردئينين و ل شوونا چاره‌سه‌ريێ‌ ئێكسه‌ر ب توندو تيژيێ‌ ده‌ست پێ‌ دكه‌ن

).

 

ل جڤاكێ‌ مه‌، پشكداريا ئه‌ندامێن خێزانێ‌ د چاره‌كرنا ئاريشه‌يان دا ل چ ئاسته‌؟ شاره‌زايێ‌ جڤاكي مايي خۆياكر كو، خێزان بۆ خێزانێ‌ جياوازيا خوه‌ هه‌يه‌ و جوره‌ هه‌ڤپه‌يڤينه‌كا ديموكراسي يا د خێزانا كورده‌واري دا هه‌ي كو بوويه‌ ئه‌گه‌ر خێزانا كوردي نه‌يا هه‌لوه‌شياي بيت و يا خوراگر بيت، ئه‌ڤجا ژ بۆ ڤێ‌ يه‌كێ‌ پێدڤيه‌ خێزانا كوردي ئه‌ڤێ‌ هه‌ڤپه‌يڤينێ‌ بپارێزيت و په‌يره‌و بكه‌ت

).

 

ل دووماهيێ‌ و ل دۆر كي به‌رپرسه‌ ژ په‌يدابوونا ئاريشه‌يێن خێزاني ڤه‌كۆله‌رێ‌ جڤاكي دبينيت كو، د هه‌ر جڤاكه‌كي دا نه‌ك ب تنێ‌ خێزان ب خوه‌ به‌رپرسه‌ به‌لكو سيسته‌مێ‌ جڤاكي ژي تا راده‌يه‌كێ‌ يێ‌ به‌رپرسه‌ و گۆت: (دڤێت حكوومه‌ت بسپۆريێ‌ پيشكێشي خه‌لكي بكه‌ت و دام و ده‌زگايێن وه‌سا هه‌بن كو بشێن ب شێوه‌يه‌كێ‌ زانستي ئاريشه‌يا وێ‌ خێزانا پێدڤي چاره‌سه‌ر بكه‌ت و ديسان پێدڤيه‌ ل سه‌ر رێكخراوێن جڤاكێ‌ مه‌ده‌ني ژي ب ئه‌ركێ‌ به‌رزكرنا ئاستێ‌ هوشياريا خێزانێ‌ رابن

).

 

گرنگيا ئاڤێ‌ بۆ ژنا دوگيان

 

ئاڤ ژبۆ ژنا دوگيان يا گرنگه‌ و چو پله‌يێن گه‌رماتيێ‌ ل سه‌ر له‌شێ‌ وێ‌ زێده‌ناكه‌ت، پرته‌قال ژي د گرنكن ژبه‌ركو ڤيتامين سي دناڤدا هـه‌نه‌ و ديسان كالسيوم ژي، پێدڤيه‌ ژنا دوگيان گرنگيێ‌ ب هـنده‌ك ژێده‌رێن خوارنێ‌ بده‌ت و ئه‌ڤ ليسته‌يا خوارنێ‌ گه‌له‌ك يا گرنگه‌ بۆ هـه‌ر ژنه‌كێ‌

 

. ترشيێن رووني ئوميگا 3 رۆله‌كێ‌ گرنگ بۆ مێشكێ‌ سوريلانكي هـه‌يه‌، خوارنێن گه‌له‌ك گرنگ بۆ ژنا دوگيان ئه‌ڤه‌نه‌ ( په‌نيرێ‌ سپي و پرته‌قال و نيسك و سپيناخ) كو هـه‌ر ئێك ژوان توخمان هـنده‌ك ژێده‌رێن سه‌ره‌كي دێ‌

 

بۆ ژنێ‌ و زارۆيێ‌ وێ‌ په‌يداكه‌ن، به‌لێ‌ تشتێ‌ ژ هـه‌ميان گرنگتر ژي ئه‌وه‌ ژن ئاڤێ‌ بير نه‌كه‌ت ژبه‌ركو ئاڤ چ پلێن گه‌رماتيێ‌ ل سه‌ر له‌شي زێده‌ ناكه‌ت و دێ‌ ساخله‌ميێ‌ پتر گه‌ش كه‌ت و ئاڤ پێگوهـۆره‌كێ‌ باشه‌ بۆ ڤه‌خوارنێن كو شه‌كر دناڤدا هـه‌ي كو ئه‌و گه‌له‌ك ب مه‌ترسينه‌ و دێ‌ مه‌ترسيا به‌رهـنگاربوونا ئه‌نسوليني ژي زێده‌كه‌ن