لقا ئێك دناڤ مه‌یدانا چالاكیێت ره‌بیێت ئاشاوادا ل سالا 1984

 

شوره‌شا 26گولانا پیروز شوره‌شه‌كا پر بزاڤ و جه‌ماوه‌ره‌كێ زور بخو ڤه‌ دگرت و چه‌ندین لق بخو ڤه‌ دگرتن ئێك ژ وان لقێت زورێت زیره‌ك و چالاك و روله‌كێ كارى گه‌ر دگێرا لقا ئێكا پارتى دیموكراتى كوردستان بو , پتریا ده‌ڤه‌را بادینان بخو ڤه‌ دگرت و چه‌ندین لیژنێت نافخویى هه‌بوون نه‌خااسمه‌ لدورێت سالا 1980. دا وه‌كى گه‌له‌ك كادرێت بناڤ وده‌نگ شوره‌شا 26 گولانێ دزانین .. جارا ئێكێ باره‌گایێ لقا ئێك ل كوماته‌ى بو لسه‌ر توخیبێ تركیا - عیراقێ و پاشى ژبه‌ر هنده‌ك گه‌ف و هه‌ره‌شه‌یێت له‌شكرێ توركى بو سه‌ر لقا ئێك لسه‌ر توخیبێ توركى .
لقا ئێك نه‌چاربو ل سالا 1983 باره‌گایێ خو ئینا دناڤ كیراتیا ئاخا عیراقێ دا و شیا باره‌گایێ خو چێكه‌ت لسه‌ر ریبارێ زێ یێ بچیك ل گوندێ (زێوه‌ نێروه‌ى) .
لقا ئێك كو پشتى (قیاداموئه‌قه‌ت) سه‌ركردایه‌تیا به‌روه‌خت , یان ئه‌م دشێن بێژین پشتى كونگرێ نه‌هێ ل سالا 1979 رولێ خو باشتر دیت و چه‌ندین به‌رپرس و جێگر بو هاتنه‌ دانان بو نمونه‌ وه‌كى
(دكتور جرجیس - هجرسندى - نجم الدین یوسف ...هتد) و چه‌ندین لیژنه‌ هاتنه‌ چێكرن كو ئه‌ڤ لیژنێت ئه‌ز دیار دكه‌م لیژنێت سالا 198. نه‌ ..

1- لیژنا زاخو - به‌رپرسایه‌تیا/ شهید فتاح گولى .
2- لیژنا دهوك - به‌رپرسایه‌تیا/ فوئاد میرانى .
3- لیژنا ئامێدیێ - به‌رپرسایه‌تیا/ شه‌هید سید صالح .
4- لیژنا شێخان - به‌رپرسایه‌تیا/ سلو خدر .
5- لیژنا ئاكرێ - به‌رپرسایه‌تیا/ شمال زبیر زێبارى .


ژچالاكى و بزاڤێت لقا ئێك یا پارتى دیموكراتى كوردستان ژبلى بزاڤێت ره‌وشه‌نبیرى و جڤاكى و رێكخستن وئابورى ... هتد .رولێ هه‌ره‌ مه‌زن هه‌بو دمه‌یدانا شه‌رى دا یان وه‌كى ( بێژین ژین و ڤه‌ژینا خو دڤیان دناڤ جه‌ماوه‌رى و پێشمه‌رگه‌ى دابیت .
دڤێ نڤیسینێدا ئه‌ز دێ رولێ لقا ئێك دگه‌ریانه‌كا وان دا بو ناڤ ده‌ڤه‌رێ ئینمه‌ بیرا خوینده‌ڤانێت هێژا و رولێ وان دێ پێش چاڤ كه‌م .
ل بیرا منه‌ سالا 1984 به‌رپرسێ لقا ئێك هه‌ڤال (نجم الدین یوسف) دگه‌ل كارگێرێ لقا ئێك شه‌هید (سید صالح)كو ئه‌وژى دبوارێ له‌شكرى دا شاره‌زایه‌كا باش هه‌بو , دگه‌ل رێكخراوا شه‌هید (شعبان عمر) كو ژرێكخراوێت زورێت زیره‌ك بو ب به‌رپرسایه‌تیا هه‌ڤال (سید نایف چه‌لكى) كو رێكخراوا ده‌ست وه‌شین بو سه‌رب لقا ئێك ڤه‌ وچه‌كه‌كێ زورێ باش هه‌بو وه‌كى ...
1. R.B.G
2. توپ 82ملم
3. توپ 57ملم
4. دوشكه‌ 14,5
5. دگه‌ل هه‌مى جورىًَ چه‌كێ سڤك


ئه‌ڤ هێزا لسه‌رى دیار كرى دگه‌ل به‌رپرس و ئه‌ندامێت لقا ئێك گه‌ریانه‌كا مه‌یدانى كر لده‌ڤه‌را وان لیژنێت سه‌رب لقا ئێك ڤه‌ وه‌كى ئه‌ز دشێم دیاركه‌م كو ئه‌ڤ هێزه‌ ((لقائێك)) هاتن بو ده‌ڤه‌را لیژنا دهوك ژى و هه‌رگونده‌كێ دگه‌هشتنێ سمینارێت پارتى دانێ وشیره‌ت و ئاراسته‌ و پێشڤه‌چونێت سیاسه‌تا پارتى و شوره‌شا 26گولانا پێشكه‌فتن خواز بوشلوڤه‌دكرن .
هه‌روه‌سا دان و ستاندن و سمینار دگه‌ل پێشمه‌رگه‌ى دكرن , نێزیكى هه‌یڤه‌كێ به‌رده‌وامى دا گه‌ریانا خو لده‌ڤه‌را لیژنا دهوكێ دا .. وپاش هنگى به‌رێ گه‌ریانا خو دا بو لیژنا ده‌ڤه‌را شێخان وپاش لیژنه‌كا شاره‌زایێت دبوارێ له‌شكرى دا هاته‌ چێكرن بو ده‌ست نیشان كرنا هنده‌ك سه‌نگه‌رو ره‌بیێت دوژمنى كو هێزه‌كا هه‌ڤپشك ژهه‌مى لیژنا وهێزا لقا ئێك سه‌ر په‌رشتیا هه‌ڤالێت لقا ئێك كو كاره‌كێ چالاكی یان (عه‌مه‌لیاته‌كا له‌شكرى) بكه‌ن ئه‌و بو دوو ره‌بیێت دوژمنى هاتنه‌ ده‌ست نیشان كرن.

1- ره‌بیا به‌رێ ته‌حتێ كو دكه‌ڤیته‌ چیایێ هنداڤ جادا دناڤ به‌را ئاشه‌وا و سه‌رسنگى كو سه‌رپه‌رشتیا وێ هه‌ڤال(عیسى زێوه‌ى) ئه‌ندامێ لیژنا دهوك بو دكر .
2- ره‌بیا سه‌رێ چیایێ هنداڤ ئاشه‌وا كو سه‌رپه‌رشتیا وێ هه‌ڤال (سید نایف) به‌رپرسێ رێكخراوا (شعبان عمر) دكرئه‌ڤان هه‌ردوو گروپا بهاریكاریا زور به‌رپرسێت زیره‌ك بون وه‌كى ( خالد بانى , صدیق زاویته‌ى , حمدی به‌گ , حسین عه‌بو , صبری بامه‌رنى , و هتد ... ) یادیار بو كو ده‌ست نیشان كرنا ڤان هه‌ردوو ره‌بیێت دوژمنى به‌رى هنگێ ب ((3)) روژا هه‌مى مینێت وان ((الغام)) وێ لیژنا ده‌ست نیشان كرنا ره‌بیێ ئینانه‌ ده‌رێ داكو بساناهى كرنا ستاندنا هه‌ردوو ره‌بیا دگه‌ل ده‌ست
نیشان كرنا وان جهێت دوژمنى ئه‌وێت بشێن كارتێكرنێ (تاپیر) لسه‌ر هێزا پێشمه‌رگه‌ى بكه‌ن وكاك خالد بانى به‌رپرسێ رێكخراوا شه‌هید (وه‌یسى بانى) روله‌كێ مێرخاسانه‌ تێدا هه‌بو بوبه‌رگریكرن ژهێزا پێشمه‌رگه‌ى , وه‌كى ئه‌ز دزانم به‌رى ئه‌ڤ هێزه‌ برێ بكه‌ڤیت بو ستاندنا ڤان هه‌ردوو ره‌بیا - كومبونه‌كا تایبه‌ت دناڤبه‌را به‌رپرسێت له‌شكرى یێت ڤێ هێزێ هاته‌ كرن دناڤبه‌را گوندێ به‌رئاشا نوكه‌ و لسپیندارێ ل مێرگا ((دارێ)) ژبه‌ر دانانا پلانا شه‌رى وده‌ست نیشانكرنا پێشمه‌رگێت زیره‌ك و خودان سه‌ربورو و پلان بڤى ره‌نگى لخارێ هاته‌ دانان ...

1- ئاراستا پێشمه‌رگه‌ى ژجهێ ده‌ست نیشان كرى بو ماوه‌ى (3) روژا دیركه‌ڤیت دا دوژمن هه‌ست ب نه‌ئارمیێ نه‌كه‌ت .
گروپه‌كا پێشمه‌رگه‌ى بێته‌ ده‌ست نیشان كرن دگه‌ل دووئار بى جى 7 ژماره‌كا زورا رمانا بسه‌رپه‌رشتیا هه‌ڤال ( عیسى زێوه‌ى ) وهاریكاریا (صبری بامه‌رنى) و شه‌هید (احمد بامه‌رنى) و گه‌له‌ك پێشمه‌رگێت زیره‌ك بو لێدانا ره‌بیا (به‌رێ ته‌حتێ) .
2- گروپه‌كا دى بسه‌رپه‌رشتیا هه‌ڤال (سید نایف چه‌لكى) و ئه‌ندامه‌تیا هه‌ڤال (صدیق زاویته‌ى) و شه‌هید (حمدی به‌گ شێلازه‌ى) و(حسین عه‌بو) وچه‌كێ وان R.B.G + (قازیفه‌ بازوكه‌) بوون .
3- گروپه‌كا دى بو لێدان و مژیلكرنا وان جهێت دوژمنى كو دشێن كارتێكرنێ (تاپیر) ێ بكه‌ن لسه‌ر پێشمه‌رگه‌ى ببه‌رپرسایه‌تیا هه‌ڤال (خالد بانى) به‌رپرسێ رێكخراوا شه‌هید (وه‌یسى بانى) .
4- گه‌له‌ك پێشمه‌رگه‌ وبه‌رپرس دڤێ چالاكیێ دا هه‌نه‌ ناڤێت وان نه‌هاتینه‌ خوارێ چونكو دا نڤیسیناوێ گه‌له‌ك درێژ بیت ئه‌ز نه‌شیام بنڤیسم هیڤیا من ئه‌وه‌ ل من ببورن ... !!

• ده‌ست پێكرنا ڤى شه‌رى ئانكو (ساعه‌ صفر) ژهه‌ڤال (عیسى زێوه‌ى) ده‌ست پێدكر – كوپشتى هه‌مى پێشمه‌رگه‌ جهێ خو بگرن و خو لبه‌ر خالێت دوژمنى به‌ربه‌لاڤ بكه‌ن ئه‌وژى لده‌م ژمێر (8) ئێڤارى روژا 1./4/1984 ل وه‌رزێ بهارێ كو ده‌مێ تارى دكه‌ته‌ ئاخێ لیژنا سه‌رپه‌رشتیا هه‌ردوو ره‌بیا ل بنێ گاره‌ى به‌رامبه‌رى هه‌ردوو ره‌بیا بوو كو هه‌ڤالێ شه‌هید (سید صالح ) كارێ وى بوو ئاراسته‌و سه‌رپه‌رشتیا شه‌رى یه‌كسه‌ر بكه‌ت .

• ده‌ست پێكرنا شه‌رى پشتى (ساعه‌ صفر) به‌ختێ مه‌ ره‌ش بو هه‌ر(ئار بى جى) یه‌كا مه‌ته‌قاند (چریك)بو ! ئانكو نه‌دهاته‌ ته‌قاندن !! به‌لێ به‌ختێ مه‌ زڤرى ڤه‌ (ئار بى جى ) یا كارێ خو فسه‌ر ئێخست وكاركرن هه‌ر بزویترین ده‌م ئه‌م شیان ره‌بیا به‌رێ ته‌حتێ بستینین پشتى شه‌ره‌كێ دژوار و ژماره‌كا سه‌ربازان تێدا هاتنه‌ كوشتن وره‌بیه‌ هاته‌ سوتن و تێكدان رولێ پێشمه‌رگه‌ى دهێرش برنێ دا گه‌له‌ك چه‌له‌نگ و زیره‌ك تربوون ژبه‌رپرسێت خو !!
یان ئه‌ز دشێم بێژم كه‌سێ خو نه‌داب كه‌سێ ! هه‌میان دڤیان به‌رى برایێ خو یێ پێشمه‌رگه‌ خو شه‌هید بكه‌ت یان بزویترین ده‌م بگه‌هیته‌ دره‌بیێ دا بو نمونه‌ ژهنده‌ك پێشمه‌رگێت چالاك و زیره‌ك

1- كریم ئێتیتى نوكه‌ به‌رپرسێ هێزا ژینگه‌هێ یه‌ ل زاویته‌ رولێ وى دهێرشێ دا بو سه‌ر ره‌بیێ نه‌خااسمه‌ بوهاڤێتنا نارنجوكا دناڤ ره‌بیێ دا زورى زیره‌ك و چالاك بو كو پێشمه‌رگێ رێكخراوا شه‌هید (احمد حاجى حسێن ) سه‌ر ب لیژنا دهوك ڤه‌ بو به‌رپرسێ وێ هه‌ڤال (صادق گه‌لناسكى)بوو .
2- شه‌هید احمد بامه‌رنى ژهه‌مى لایان ڤه‌ زور زور باش بو .
3- صبری بامه‌رنى ساخله‌تێن زیره‌كیا وى زورن نه‌شێم دڤێره‌دا هه‌میا بێژم ودیاركه‌م چونكى گه‌له‌كن.
4- (له‌زگین عساف بانه‌سورى)( ژى نه‌ژ هه‌ڤالێت خو كێم تربوو ژ ژلیژنا دهوك دگه‌ل هه‌ڤال (صادق گه‌لناسكى) بوو .
5-(جلال حسن زێوه‌ى) مل ب ملێ هه‌ڤال كریم ئێتیتى هێرش دبره‌ سه‌ر ره‌بیێ ژژلیژنا دهوك دگه‌ل هه‌ڤال( صادق گه‌لناسكى ) بوو .
6- هه‌ڤال سفر زاویته‌ى كو به‌رپرسێ به‌شه‌كێ هه‌والگیریا ف . دهوكه‌ زور زیره‌ك بو هه‌روه‌ساهه‌ڤال جمیل احمد زاویته‌ى روله‌كێ باش هه‌بو .
7- براستى هه‌ڤال دزورن ناڤێت وان لبیرا من نینن ئه‌ز دیار بكه‌م یان بنڤیسم داخازا من لێبورینا وانه‌ .

• پشتى گروپا ره‌بیا به‌رێ ته‌حتێ ئارمانجا خو سه‌ركه‌فتیانه‌ بجه ئیناى ده‌ست كه‌فتى ئه‌ڤێن لخارێ بوون ...

1- شه‌ش كلاشینكوف .
2- (ئار بى جى ) یه‌كا ژكاركه‌فتى ژئه‌گه‌رێ شه‌رى .
3- ژماره‌كا زور یا رمانا و ته‌قه‌مه‌نى و جهازه‌كێ لاسلكى .
4- ژماره‌كا زور ا كه‌ل و په‌ل و نهێنیێت له‌شكرى .
5- پێشمه‌رگه‌ هه‌مى بسلامه‌ت بوون بتنێ برینداربونه‌كا سڤك یا هه‌ڤال (عیسى زێوه‌ى) .

• وه‌كى هه‌مى چالاكیێت شه‌رى پشتى ئه‌نجامدانا چالاكیێ جهه‌ك هه‌بو لێ كوم دبوون جهێ ڤێ جارێ خالا سه‌رپه‌رشتیا شه‌رى بو كو جهێ شه‌هید (سید صالح ) بو ..
پشتى ئه‌م بسلامه‌تى گه‌هشتینه‌ ده‌ف شه‌هید (سید صالح) پرسیارا ساخى و سلامه‌تیا مه‌ كرى – ئه‌م گه‌له‌ك تێنى و برسى و وه‌ستیاى بوین ئه‌م ته‌كلیف كرین دهه‌وارا گروپا هه‌ڤال (سید نایف ) بچین كو زانى بو ژماره‌كا پێشمه‌رگه‌ى بریندارو شه‌هیدن !
براستى چه‌كێ ڤێ گروپا ره‌بیا ئاشه‌وا چه‌كه‌كێ زورى باش بو هه‌ر گه‌له‌ك و زیكا شیان ئاگرى به‌رده‌نه‌ ره‌بیا خو به‌لێ مخابن من توپه‌كا دوژمنى بناڤ پێشمه‌رگه‌ى دكه‌ڤیت زور شه‌هیدو برینداربوون.

ئه‌ڤ هه‌ڤالێت هاتینه‌ ده‌ست نیشان كرن ببه‌رپرسایه‌تیا هه‌ڤال سید نایف چه‌لكى و سعدی زاویته‌ى و شه‌هید حمدی به‌گ هه‌مى تژى سه‌ربورێت ستاندنا ره‌بیا هه‌بو و پێشمه‌رگێت زورێت زیره‌ك دگه‌ل بوون كێماسى دهێرشێ دا بو سه‌ر ره‌بیێ نه‌دكر .

• براستى ده‌مێ ئه‌ز هاتیمه‌ ته‌كلیف كرن كو بچم هاریكاریا هه‌ڤال( سید نایف) بكه‌م و هه‌ڤال سید نایف دسه‌رهندێ را كو ژماره‌كا شه‌هیدو بریندارا هه‌نه‌ گوته‌ من ئه‌ز حه‌ز دكه‌م هارى من بكه‌ى داجاره‌كادى هێرشێ بینه‌ سه‌ر ره‌بیا هنداڤ ئاشه‌وا - به‌لێ یادیار بو ئه‌م زور دوه‌ستیاى بوین و فیشه‌ك وته‌قه‌مه‌نى مه‌ كێم مابون ئه‌م نه‌شیاین داخازاوى بجه بینن ژبه‌رهندێ ئه‌م بكارێ وه‌فاداریێ دگه‌ل هه‌ڤالێت خو یێ پێشمه‌رگه‌ رابوین بهه‌لگرتنا شه‌هیدو بریندارا ئه‌ڤه‌ژى ناڤێت
شه‌هیدو هنده‌ك بریندارانن ئه‌وێ لبیرامن ...

1- شه‌هید / صالح سلیم ئاسیهێ به‌رواریا ژرێكخراوا شه‌هید (شعبان عمر) جه‌نازێ وى ل مه‌به‌رزه‌بو چونكى شه‌ڤ بو !
2- شه‌هید / احمد عمر بێدهى ژرێكخراواشه‌هید (شعبان عمر) .
3- شه‌هید / فریق ئوسمان تیله‌رى ژرێكخراوا شه‌هید(شعبان عمر) .
4- شه‌هید / محمد تاهر ژرێكخراوا شه‌هید(انور مایى) كو به‌رپرسێ وێ شه‌هید (حمدی به‌گ) بو . .

ناڤێت بریندارا ...
1- صدیق زاویته‌ى / به‌رپرسێ رێكخراوا شه‌هید(علی عه‌بو) .
2- حمدی به‌گ / به‌رپرسێ رێكخراوا شه‌هید (انور مایى) .
3- حسین عه‌بو / جێگرێ رێكخراوا شه‌هید (علی عه‌بو) .


4- پ . م / سلیم .
5- پ . م / محمد سلیم .
6- پ . م / بدل محمد هه‌سنه‌كى .
7- پ . م / قادر بێدهى .
8- پ.م / عیسا زێوه‌ى ب برینه‌كا سڤك هاته‌ برین دار كرن .

راستى لبیرامن نینن داخازا لێبورینێ دكه‌م به‌لێ وه‌كى ئه‌ز دزانم (12) هه‌ڤال بریندار ببون .
ده‌مێ من دیت یان به‌رێخودا ره‌بیا هنداڤى ئاشه‌وا ده‌مێ گورزێت پێشمه‌رگه‌ى دچونێ وئاگرژى ژێ دپه‌شى - من هزركرئه‌و دێ گه‌له‌ك به‌راهیكا مه‌ خالا خو ستینن چونكى هه‌ڤالێت زور زیره‌ك دگه‌ل وێ گروپێ بوون - ژبه‌رهندێ هه‌ر گروپه‌كى دڤیا زیترین ئارمانجا خو بستینن ئه‌ڤه‌ژى سالوخه‌ته‌كێ پێشمه‌رگه‌ى بوو به‌ریكانه‌ بو كانێ كى دێ به‌رى یێ دى دوژمنێ خو كوژیت و بێ ده‌نگ كه‌ت ئارماجا خو بستینیت .

• ژبیر نه‌كه‌م هاریكاریا مه‌ بو گروپا هه‌ڤال سید نایف هه‌لگرتنا هنده‌ك بریندارا و شه‌هیده‌كى لبیرا من نینه‌ كیش هه‌ڤالێ شه‌هیده‌ كو مه‌ هه‌لگرتى و دگه‌ل خو برین
ژبه‌ركو ئه‌م گه‌له‌ك شاره‌زایێت رێكێت چیایێ گاره‌ نه‌بووین , مه‌ داربه‌سته‌ك بوشه‌هیدى چێكر ئو مه‌ سیارى هێستره‌كێ كرو به‌ره‌ڤ گوندێ سپیندارێ ئه‌م فرێكه‌تین .. چیایێ گاره‌ى چیایه‌كێ زورى ئاسێ یه‌ وئه‌م ل رێكێ خه‌له‌ت بووین نێزیكى به‌رێ سپێدى ئه‌م گه‌هشتینه‌ ناڤبه‌را گوندێ سیارێ و سپیندارێ و پاشى ئه‌م به‌ره‌ڤ گوندێ سپیندارێ فرێكه‌تین ..( گوندێ سپیندارێ گونده‌كێ بوشه‌ گونده‌كێ كورد په‌روه‌ره‌ گونده‌كێ دلسوزه‌ خودانێ به‌نكه‌كا شه‌هیدانه‌) !
ژبه‌ر هندێ گوندیا ده‌مێ گوه ل شه‌هیدبون و برینداربونا هه‌ڤالێت پێشمه‌رگه‌ بووى زور بخه‌م كه‌تن .. سه‌رهندێ را پێشوازیه‌كا زور وه‌فادار و برایه‌تى دگه‌ل مه‌ كر .. هه‌ولدا تشته‌كى بكه‌ن كو بومه‌ دیار بكه‌ن شه‌هیدبون و بریداریا هه‌ڤالێت پێشمه‌رگه‌ رێكا راست و درسته‌ بو بده‌ستڤه‌ ئینانا مافێت ملله‌تێ كورد ((ئها ئه‌وا ئه‌م ئه‌ڤرو گه‌هشتینێ خزمه‌ت و خه‌باتا وان شه‌هیدانه‌ ئه‌وا گوندێ سپیندارێ بو د گوت و ڤه‌دگێرا))

• خوینده‌ڤانێت گوڤارا پێشمه‌رگه‌ ...
بتنێ ئه‌و پێشمه‌رگه‌ , دشێن پێناس و ماندیبون و وه‌ستیانا وێ شه‌ڤێ بكه‌ن ئه‌وا شه‌هید دگه‌ل وان و ژ چیایێ گاره‌ى یێ ئاسێ ده‌رباز بووین تاگه‌هشتینه‌ سپیندارێ چونكى ئه‌ز بدرستى نه‌شێم پێناس بكه‌م !

• وه‌كى من دیتى گوندێ سپیندارێ زور هاریكارى یا مه‌ كر ب كولان و ڤه‌شارتنا شه‌هیدان و ده‌رمانكرنا بریندارا - هه‌ڤال (نجم الدین یوسفى) ده‌مێ رێ و ره‌ سمێ ڤه‌شارتنا شه‌هیدا بدوماهى هاتى سمیناره‌كا زورا كارى گه‌ر پێشكێشى گوندیا و پێشمه‌رگه‌ى كر - باوه‌ر بكه‌ن كه‌س لسه‌ر گورستانا گوندێ سپیندارێ نه‌ما چاڤێت وى تژى روندك نه‌بووین .. ؟!

لدوماهیێ ئه‌ز برێكا گوڤارا ده‌نگێ پێشمه‌رگه‌ زور زور سوپاسیا گوندێ سپیندارێ دكه‌م بو وێ هاریكاریا بومه‌ كرى ..و هزار سلاڤ لگیانێ پاقژێ هه‌مى شه‌هیدابن و سه‌ركاروانێ وان بارزانیێ نه‌مر.