ره‌مه‌زان شعبان رشید حسین


Şehîd   Remezan Şheaban   Bamernî


ژ دایك بوویێ ( 1955 ) یه‌ .

خه‌لكێ گوندێ ( بامه‌رنێ ) یه‌ سه‌رب ناحیا ( بامه‌رنێ )ڤه‌ .

به‌شدارى د شوره‌شا ئه‌یلولێدا كریه‌ لسالا ( 1974-1975)

به‌شدارى د شوره‌شا گولانێ دا كریه‌ لسالا ( 1976-1980 ) دگه‌ل شعبان غفار سه‌رب لیژنا ناوچا ئامێدیێ ڤه‌ .

ل سالا ( 1980 ) د شه‌ره‌كیدا دگه‌ل دوژمنى ل گوندێ كه‌لا شێخوى تێته‌ شه‌هید كرن و جه‌نازێ وى كه‌تیه‌ ده‌ستێن دوژمنى و هاتیه‌ به‌رزه‌كرن .

پله‌ : پ.م


داستان كه‌لا شێخو

 

دیدار وبه‌رهه‌ڤكرن: عه‌لى دهوكى داستانا كه‌لا شێخو ل 17/11/1980 ب زه‌ند وباسكێن شێره‌كورێت پارتى وبارزانى هاتیه‌ ئه‌نجامدان.. ل داستانا كه‌لا شێخو ژنیشكه‌كێ ڤه‌ هێزێن دوژمنى وپێشمه‌رگێ چاڤ نه‌ترسێ كوردستانێ لسه‌ر جادا دناڤبه‌را گوندێ وه‌رمێلێ وكه‌لا شێخو كه‌تنه‌ به‌ر ئێك به‌لێ ب شێرانه‌ ودماوێ كێمتر ژ سێ ده‌م ژمێرادا هه‌مى هێزێن دوژمنى تێك وپێك دان وگه‌له‌ك ژێ كوشتن وگه‌له‌ك ژێ ئێخسیر كرن و ب راستى شه‌هید تاهر زێوه‌ى وشه‌هید شه‌عبان غه‌فار بازیێ به‌هدینا ده‌وره‌كێ سه‌ره‌كى هه‌بو دڤێ داستانێ دا... ئه‌م ژى وه‌كو گوڤارا ده‌نگێ پێشمه‌رگه‌ كو په‌یاما مه‌ ئه‌وه‌ داستانێن پێشمه‌رگێن كوردستانێ ساخ كه‌ینه‌ڤه‌ له‌وا وبو ساخ كرنا بیره‌وه‌ریا (21) سالیا ڤێ داستانێ ئه‌م چوینه‌ گه‌لیێ دهێ وهێدى هێدى ل چیایێ مه‌تینى سه‌ركه‌تینه‌ (گه‌را عه‌لى مه‌ندا) وژوردا قولپینه‌ نزارى ولسه‌ر جاددێ ول مه‌وقعێ شه‌رى ول جهێ داستانێ مه‌خوه‌ نێزیكى هژماره‌كا قه‌هره‌مانا كر كو پشكداریه‌كا كاریگه‌ر هه‌بوویه‌ دڤێ داستانێدا وبڤى ره‌نگێ خوارێ: رێزدار جه‌میل بێسفكى سه‌ركردێ سوپاى/15 كو لوى ده‌مى كادرێ رێكخراوا شه‌هید تاهر زێوه‌ى بو لدور داستانا كه‌لا شێخو دبێژیت: ب راستى ده‌ڤه‌را كه‌لا شێخو هه‌مى ره‌بیێن دوژمنى بوون و خه‌لكێ ده‌ڤه‌رێ گه‌له‌ك یێ نه‌ئارام بو ژ به‌ر هێزێت دوژمنى وزێده‌گاڤیێن وا لسه‌ر هاوولاتیا، پاش مه‌ دیت دوژمن یێ ره‌بیێت خو ڤه‌دكێشن، مه‌ژى ب دێربینێ به‌رێ خوه‌ ددایێ وسپێدێ زوى ئه‌م هاتینه‌ كه‌لا شێخو ومه‌ تێشت لوێرێ خوار داكو هاوولاتى ژى بزانن كو ئه‌ڤه‌ پێشمه‌رگه‌ په‌یدا بو، پاش ئه‌م چوینه‌ پشتا گوندى ل نێزیك گورستانێ وئه‌م روینشتین، شه‌هید تاهر زێوه‌ى كو به‌رپرسێ مه‌یێ له‌شكرى بو گۆت: ئه‌ز دبێژم دوژمن دێ خو ژڤێ ده‌ڤه‌رێ ڤه‌كیشیت ژ به‌ر چه‌ند مه‌ره‌مه‌كا وئه‌گه‌ر بچین ره‌بیا (پانا دبێ) ئه‌ڤا ل هنداڤ (بانكا) دوربه‌كى لێ بده‌ین به‌رى خو بڤه‌كێشن داكو هیشتا مه‌عنه‌ویاتێن وا بهێنه‌ خوارێ دێ گه‌له‌ك باش بیت، ئه‌م رێككه‌فتین كو كاك تاهر زێوه‌ى بچیته‌ ئیستیتلاعێ وگوته‌ من نامه‌كێ بو (محه‌مه‌د حه‌مدى وعه‌ریف ناسر)ى ب هنێره‌ یێ ل (وه‌رمێلێ) داكو ئێڤارى بهێن وببینه‌ ئێك هێز ودوربه‌كێ ب دانین دوژمنى، شه‌هید تاهر زێوه‌ى دگه‌ل دوو پێشمه‌رگا چوونه‌ ئیستیتلاعا ره‌بیێ، وئه‌ز ونایف زێوه‌ى چوینه‌ گوندێ كه‌لا شێخو داكو ئێك ژ هه‌ڤالا نامامه‌ بگه‌هینته‌ جهێ ده‌ست نیشانكرى، مه‌ژى هه‌ڤالێت خو رێك ئێخستن كو ژمارا گرۆپا دگه‌ل مه‌ (11) پێشمه‌رگه‌ بوون وئه‌م هاتینه‌ سه‌ر جاددێ وژ نیشكه‌كێ ڤه‌ به‌رێ خوه‌ د ده‌ینه‌ (4) یان (5) زیلێت دوژمنى هاتن، وئه‌م گه‌له‌ك دنێزیكى ئێك بوین دویراتیا دناڤبه‌را مه‌دا (50م) بوون وهه‌ر ل گه‌را ئێكێ ژ شه‌رى، ئامرێ عه‌سكه‌رى یێ دوژمنى بانگه‌وازا دا (40) سه‌ربازا كو خوه‌ زك وزك ل ئه‌ردى بده‌ن وته‌قێ بكه‌ن به‌لێ دخورا نه‌ددیت هه‌تا جارا سیێ ته‌قه‌كرى و ب راستى پێشمه‌رگه‌ى ده‌لیڤه‌نه‌دایێ كو بێهنا خو ڤه‌ده‌ن به‌لێ ژمارا مه‌ یا كێم بوو وجیهاز دگه‌ل مه‌ نه‌بوو كو په‌یوه‌ندیێ ب هه‌مى هه‌ڤالا بكه‌ین پاش پێزانین گه‌هشتنه‌ لقا ئێك كو شه‌ره‌كێ ل جاددا كه‌لا شێخو دهێته‌ كرن كو لوى ده‌مى كاك (د.جرجیس) به‌رپرسێ لقێ بو وباره‌گایێ مه‌زن ل (بێلیزانێ) بو ئێكسه‌ر د هه‌وارا مه‌ هات ولبه‌راهى یا هه‌میا بازیێ به‌هدینا (شه‌عبان غه‌فار) گه‌هشت ول هه‌مى میحوه‌را دهات ودچوو وگه‌له‌ك یێ ب بزاڤ بو ده‌مێ هاتین وجه‌نازێت سه‌ربازێت دوژمنى دیتین كه‌یفا وا هات وكه‌یفا مه‌ ژى هات كو هاریكارى بو مه‌ هات ومه‌عنه‌ویاتێن مه‌ پتر بلند بوون وفیشه‌ك وته‌قه‌مه‌نیێ زێده‌ بو مه‌ ئینا وهه‌ر دعه‌ینى وه‌خت دا شه‌هید تاهر زێوه‌ى چو بو ئیستیتلاعێ كو ئه‌م چالاكیه‌كێ لجهه‌كێ دى ئه‌نجام بده‌ین، ئه‌وژى ئێكسه‌ر دگه‌ل دوو هه‌ڤالێت پ.م د هه‌وارا مه‌ هاتنه‌ سه‌ر جاددێ ودوو گوللێت (ئار پى چى) یێ دانان به‌لێ جهێ داخێ یه‌ تاهر بگرانى بریندار بوو، دوێ ده‌لیڤێ دا شه‌هید شه‌عبان غه‌فار گوته‌ من (هه‌ره‌ بگه‌هه‌ تاهرى یان یێ شه‌هید بویى یانژى بێ چاره‌یه‌).. ئه‌ز گه‌هشتمه‌ تاهرى، به‌رێ خوه‌ دده‌مێ نائیف ژیهات، ئێكسه‌ر من تاهر دا پشتا خو، گوت: (من دانه‌ ته‌ ئه‌ز كوشتم) چونكى گولله‌ ژ پشتا وى كه‌فتبوو وزكێ وى گه‌له‌ك بریندار كربوو برینا زكێ وى گه‌له‌ك فره‌ه ببو پاش من دانا وده‌ستێ وى یێ راستێ من دانا سه‌ر ملێ خو وده‌ستێ دى لسه‌ر ملێ نائیفى برایێ وى وئه‌م دبه‌ته‌نه‌كێ دا چوینه‌ خوار، سه‌ربازه‌كێ دوژمنى خو ل پشت به‌ره‌كى ڤه‌شارتبو وئه‌م ژى ب تاهرى ڤه‌ د مژویل بووین، ئه‌وى ته‌قه‌ ل مه‌ كر و ملێ نائیفى بریندار بو و گولله‌كا دى بده‌ستێ تاهرى كه‌ت وگولله‌كا دى ب سه‌رێ وى ئانكو ئه‌ڤه‌ تاهر ژ سێ ره‌خاڤه‌ بریندار بوو، وئه‌م ژێ بێ هیڤى بوین به‌لێ تاهر لسه‌ر هێشێت خو بوو وئێكسه‌ر گۆته‌ من : (جه‌میل سه‌رێ من گرێده‌) پاش هه‌ڤال د هه‌وارا مه‌ هاتن ومه‌ تاهر بره‌ گوندى ودختوره‌ك هه‌بو بناڤێ (عه‌زیز ئه‌رزى) ب راستى تاهر ونائیف ده‌رمان كرن ومه‌ ژ گوندى ده‌رئێخستن، دڤێ داستانێ دا دوو پێشمه‌رگێن قه‌هره‌مان شه‌هید بوون ئه‌و ژى ئه‌ڤه‌نه‌: • شه‌هید موسا ئه‌لكیشكى • شه‌هید ره‌مه‌زان بامه‌رنی وبریندارێن مه‌ژى ئه‌ڤێن ل خوارێ نه‌: • تاهر زێوه‌ى • نائیف زێوه‌ى • فه‌رسه‌ت بێسفكى • محه‌مه‌د عوبه‌ید وێ رۆژێ و وان كاودانا گه‌له‌ك بوون، سه‌باره‌ت گرۆپا (شه‌عبان غه‌فار)ى براستى بدرستى ناهێته‌ بیرا من به‌لێ ده‌مێ ئه‌م چوینه‌ لقێ لده‌ڤ كاك (د.جرجیس) رژد بون وحه‌ماس وپشت گه‌رمى یا وا پتر لێ هات وچه‌كێ شه‌ره‌فێ هه‌لگرتن وشه‌رێ مان ونه‌مانێ كرن ، ل ده‌م ژمێر (2) پشتى نیڤرو بو هه‌تا پێنجى ئێڤارى مه‌ دانا ئێك و دوو و خودێ شاهده‌ لسه‌ر ئاخفتنا من مه‌ گه‌له‌ك ژێ كوشتن و گه‌له‌ك ژێ بریندار كرن چونكى ب درستى ئه‌ز نه‌شێم ژمارێ بده‌مه‌ته‌، و دڤێ داستانێ دا ئه‌ز بریندار بووم وبرایێ من تاهر زێوه‌ى دوو جارا بریندار بوو وگولله‌ ژ سێ جهێن له‌شێ وى كه‌فتن (ملێ وى، پشتا وى وچاڤێ وى) به‌لێ خوشبه‌ختانه‌ جاره‌كادى ساخ بو ڤه‌ و ب ده‌هان داستانێن قاره‌مانانه‌ بسه‌ركه‌فتیانه‌ ئه‌نجام دان ورولێ وى یێ دیار بو هه‌تا كو لده‌ستپێكا نیسانا سالا 1991 د داستانه‌كا شێرانه‌ دا ل سه‌رسنكێ شه‌هید دبیت و د گه‌هیته‌ كاروانێ شه‌هیدێن كورد وكوردستانێ. پ.م فه‌رسه‌ت بێسفكى ئێك ژوان هه‌ڤالا بوویه‌ یێن كو پشكدارى د داستانا كه‌لا شێخو دا كرى و دبێژیت: (ب راستى داستانا كه‌لا شێخو داستانه‌كا نه‌وعى بو لسه‌ر ئاستێ ده‌ڤه‌رێ و گوت مه‌ جه‌ردا خو كر وه‌ك ده‌ستكه‌فتى نێزیكى (30) هه‌تا (40) تڤه‌نگ بده‌ستمه‌كه‌فتن، هه‌روه‌سا بریندار وكوشتى یێت دوژمنى گه‌له‌ك بوون ودناڤ وان كوشتى یادا ئه‌فسه‌ره‌ك ب پلا (نقیب) بو... و ب راستى چه‌ندى ئه‌م به‌حسێ ڤێ داستانێ بكه‌ین ئه‌م نه‌شێین ب درستى په‌سنا وێ بكه‌ین وده‌نگه‌ڤه‌دانه‌كا مه‌زن ژى هه‌بوو ژبه‌ر كو لوى ده‌مێ جێشا دوژمنى هه‌مى جه كونترول كر بوون وهێشتا ئیراق ل سه‌ر هێزا خو بوو و ئه‌وان باوه‌ر نه‌دكر كو پێشمه‌رگه‌ بڤى ره‌نگى دێ به‌ره‌ڤانیێ ژ كه‌رامه‌ت وسه‌روه‌ریا ملله‌تى كه‌تن ئه‌ڤه‌ بكورتى مه‌ بو هه‌وه‌ به‌حسێ داستانا كه‌لا شێخو كر. ژێده‌ر :ده‌نگێ پێشمه‌رگه‌ ژماره‌ 48 كانونا یه‌كه‌م سالا 2001

 

 






Şehîd Remezan Şeaban Reşîd Bamernî 

û Fewzî Bamernî 1980

******************************




Pêzanîn û Amadekirin  
FERHAD BAMERNΠ Hollanda 2008